УСАН БУЛАГ хэмээх алтан сургаал
ЛУВСАНДАМБИЙЖАЛЦАН (1717-1766)
Усан булаг дэлгэрвэл
Уужим дэлхий тунгалаг
«Оюун түлхүүр» үзвэл
Ухаан билиг тунгалаг
***
Шастир арвин үзвэл
Санаа ухаан тунгалаг
Сайн ламыг шүтвэл
Сүнс тонилох тунгалаг
***
Шавраас гарсан
Замбага цэцэг тунгалаг
Салхин хурдан зогсвол
Огторгуй газар тунгалаг
***
Сүн далайн дундаас
Сүмбэр уул тунгалаг
Сүсэгт хүмүүний зүрхэнд
Сүлд тэнгэр тунгалаг
***
Хирүүд үгүй өсөгч
Хээрийн гөрөөс тунгалаг
Хилинц нүглийг арилгагч
Хийдийн газар тунгалаг
***
Буржин үгүй урсагч
Булгийн ус тунгалаг
Бусдад тус хүргэвэл
Буян болох тунгалаг
***
Буруу зөвийг ялгавал
Арш болох тунгалаг
Буян үйлдэж явбал
Бурхан болох тунгалаг
***
Ариун тэнгэрийн оронд
Алхаад гарах бэрх буй
Арван найман тамаас
Амьд гарах бэрх буй
***
Чин дээд тэнгэрт
Чиглэн одох бэрх буй
Цэрэг дайны дундаас
Ганцаар гарах бэрх буй
***
Аглаг уулын орой дээр
Нутаглан суух бэрх буй
Арсланы нуруун дээр
Эмээл тохоход бэрх буй
***
Асга хадны оргил дээр
Авиран гарахад бэрх буй
Асар их тэнгэр дээр
Аян хийхэд бэрх буй
***
Хөвөн цагаан үүлийг
Хөөгөөд гүйцэх бэрх буй
Хөхөрч байх зэрэглээг
Бариад авах бэрх буй
***
Харгис муу хүмүүнтэй
Анд барилдах бэрх буй
Хажир хэдэр хүмүүнтэй
Ханилан суух бэрх буй
***
Доорд аймаг лусуудад
Айлчлан очих бэрх буй
Догшин хорт могойтой
Ах дүү болох бэрх буй
***
Гарах нар нь шарлавал
Ган болохын удлага
Гаран орон гасалбал
Гай ирэхийн удлага
***
Ургах нар нь улайвал
Ус болохын удлага
Орон гаран гасалбал
Эдээ барахын удлага
***
Эмнэг морь нь туйлбал
Эмээлээ гээхийн удлага
Эм хүмүүн ганганавал
Эрдээ гээгдэхийн удлага
***
Зүүн хойноос жаварлавал
Зуд болохын удлага
Зөрүү буруу харвал
Эеэ барахын удлага
***
Догшин сахиус залбал
Дайсан дарахын удлага
Доор сэтгэлийг баривал
Мэргэн болохын удлага
***
Дулаан хүйтэн улирвал
Цаг мөчийн удлага
Дур мэдэн явбал
Тэнэг болохын удлага
***
Дотрын цагаан сэтгэл нь
Буян болохын удлага
Догшин хар сэтгэл нь
Хилэнц болохын удлага
***
Буянтай сайн сэтгэл нь
Бурхан болохын удлага
Буруу хар сэтгэл нь
Буг болохын удлага
***
Энэ мэтийн удлагыг
Эрхэм болгон мэдээд
Энэ хойтын тусыг
Эндэл үгүй автугай
Эх сурвалж: muzo.mn