ӨРГӨӨ

Нэгэн тариачин эр шавар ваар авч яваад түүнийгээ гээчихэж гэнэ. Гэтэл нэгэн ялаа нисэн ирээд:

• Энэ хэний өргөө юм бэ? Энэ өргөөнд ямар амьтан сууж байна вэ? гэж асууж гэнэ. Гэтэл хариу дуугарсангүй.

Вааран дотор ямар ч амьтан байсангүй. Тэгэхлээр дүнгэнүүр ялаа маань вааран дотор нисэн ороод тэнд амьдран суух болж гэнэ.

Гэтэл жонгинуур шумуул нисэн ирж гэнэ. Тэгээд мань шумуул:

• Энэ өргөө хэнийх вэ? Энэ өргөөнд ямар амьтан амьдарч байна? гэж асууж гэнэ. Гэтэл.
• Би дүнгэнүүр ялаа байна. Харин чи хэн бэ? гэж ялаа асууж гэнэ.
• Би жонгинуур шумуул гэгч байна гэжээ.

Ялаа:

• Наашаа ороод ир л дээ. Хамт амьдарья гэжээ.

Ингээд ялаа, шумуул хоёр хамт амьдрах болж гэнэ.

Гэтэл удалгүй мэрэгч хулгана хүрч ирээд:

• Энэ хэний өргөө вэ? Энэ өргөөнд хэн амьдарч байиа вэ? ч гэж асуужээ.
• Дүнгэнүүр ялаа.
• Би жонгинуур шумуул байна. Чи өөрөө хэн гэгч вэ? гэж асуужээ.
• Би мэрэгч хулгана байна гэхэд
• Манайд ороод ир л дээ гэжээ. Ингээд гурвуулаа амьдрах болж гэнэ.

Гэтэл орилоо мэлхий дэвхэрч ирээд:

• Энэ хэний сууц вэ? Энэ өргөөнд хэн амьдарч байна вэ? гэж асуужээ.
• Би дүнгэнүүр ялаа,
• Би жонгинуур шумуул,
• Би мэрэгч хулгана байна. Харин өөрөө хэн бэ? гэж асуужээ.
• Би наргианч мэлхий байна гэжээ.
• Манайд ороод ир л дээ гэж гэнэ. Ингээд дөрвүүлээ амьдрах болжээ.

Гэтэл дэлдэн туулай дэгдэн ирээд.

• Энэ хэний сууц юм бэ? Энэ өргөөнд хэн амьдардаг юм бэ? гэж асуужээ.
• Би дүнгэнүүр ялаа,
• Би жонгинуур шумуул,
• Би мэрэгч хулгана,
• Би наргианч мэлхий байна. Харин өөрөө хэн бэ? гэж гэнэ.
• Би дэрс бутан дунд дэгдэн харайдаг майга туулай байна! гэжээ.
• Манайд ороод ир л дээ! гэж гэнэ.

Ингээд тавуулаа амьдрах болжээ. Гэтэл дэргэд нь үнэг гүйж ирээд:

• Энэ хэний сууц юм бэ? Энэ өргөөнд хэн амьдарч байна вэ? гэж асуужээ.
• Би дүнгэнүүр ялаа,
• Би жонгинуур шумуул,
• Би мэрэгч хулгана,
• Би наргианч мэлхий,
• Би майга туулай байна. Харин өөрөө хэн бэ? гэж гэнэ.
• Би уулын улаан үнэг байна гэжээ.
• Манайд ороод ир л дээ гэж гэнэ. Ингээд зургуулаа амьдрах бол-жээ.

Гэтэл тэдэн дээр хөх чоно ирээд:

• Энэ хэний сууц юм бэ? Энэ өргөөнд хэн амьдарч байна вэ? гэж асуужээ.
• Би дүнгэнүүр ялаа,
• Би жонгинуур шумуул,
• Би мэрэгч хулгана,
• Би наргианч мэлхий,
• Би майга туулай,
• Би улаан үнэг байна. Харин өөрөө хэн бэ? гэж асуужээ.
• Би бутны цаанаас булаан шүүрдэг чоно байна гэжээ.
• Манайд ороод ир л дээ гэж гэнэ. Ингээд тэд долуулаа уйдаж гунихыг мэдэхгүй амьдрах болжээ.

Гэтэл хөвчийн хүрэн баавгай хүрч ирээд ваарыг нь тогшиж

• Энэ хэний сууц юм бэ? Энэ өргөөнд хэн амьдарч байна вэ? гэж асууж гэнэ.
• Би дүнгэнүүр ялаа,
• Би жонгинуур шумуул,
• Би мэрэгч хулгана,
• Би наргианч мэлхий,
• Би майга туулай,
• Би уулын улаан үнэг,
• Би бутны цаанаас булаан шүүрдэг чоно байна. Харин өөрөө хэн бэ? гэж гэнэ.
• Би та нарын захирагч байна гэжээ.

Тэгээд баавгай вааран дээр лаг хийтэл суутал шавар ваар хага үсэрч гэнэ. Дотор нь байсан бүх амьтад айн сандарч тал бүртээ таржээ.