Үнэг, чоно, зараа гурав
Эрт цагт чоно, үнэг, зараа гурав амьдарч байжээ. Гэтэл нэг өдөр ганц чавга олж, түүнийгээ хэн нь идэхийг хэлэлцжээ. Чоно:
– Архинд хэн амархан согтдог маань идье гэв. Энэ саналыг бүгдээрээ зөвшөөрөв. Тэгээд чоно:
– Би амсаад согтдог гэв. Үнэг:
– Би үнэрлээд согтдог гэв. Зараа:
– Би сонсохоороо согтдог гээд гуйвж байж гэнэ. Ингээд зараа идэхээр болж гэнэ.
Гэтэл үнэг дахин заль гаргаж:
– Уралдаад хэн түрүүлсэн маань идье гэжээ. Нөгөө хоёр нь зөвшөөрөөд уралдацгааж гэнэ. Зараа үнэгний сүүлд нь зүүгдэн явж гэнэ. Үнэг хар эрчээрээ давхиж ирээд өөрийгөө түрүүлсэн гэж бодоод эргэж хартал зараа ард нь зогсоод:
– Чи чинь одоо л дөнгөж ирж байгаа нь энэ үү? гэж хэлжээ. Ингээд зараа түрүүлсэн учир чавгаа идэж гэнэ.
